Sunday, August 6, 2023

නැව් කථා 7

නාවිකයන් අතර ප්‍රචලිත කථාවක් ඇත.ඒ three "B " වල කරක්ගසා නැතිනම් ඔහු නියම නාවිකයකු නොවේ "යන්නය. මේ "3 B "යනු ලෝකයේ ප්‍රධාන තැන් තුනකි.ඒවා නම්

#බොම්බාය
#බැන්කොක් සහ
# බ්‍රසීලය වේ.

පෙර කල නාවිකයන් දැඩි ලෙස විනෝදයට බර වූවන් විය.මේ ස්ථාන තුනම එකල නාවිකයන්හට විනෝද වීමට තිබූ හොදම ස්ථාන විය.මේ කථාව ගොඩ නැගුනේ ඒ නිසා විය යුතුය.නමුත් දැන් නාවිකයන් ඉතාමත් හොද විනයක් සහිතව මෙන්ම පැහැදිලි ජීවිත සැලසුමකින් රැකියාව කරන නිසා ඒ  ජීවිතය වත්මන් නාවිකයන් තුල දක්නට නැතිවීම සතුටට හේතුවකි.

මා මේ ස්ථාන තුන අතරින් බ්‍රසීලයේ දී විදි අත්දැකීම් කිහිපයක් අකුරු කරන්නට සිතුවේ දිගු කලකින් නැව් කථාවක් සමූහයේ පල නොකල නිසාවෙනි.

බ්‍රසීලයේ දී මා ලද සුන්දරම අත්දැකීම වනුයේ ඇමසන් ගංගාව දිගේ රට තුල පිහිටි වරායකට ගිය ගමන් කිහිපයයි.රට තුල පිහිටි " මුංගුබා " නම් වරායට අප ගියේ කෙවොලින් නම් භාණ්ඩ වර්ගය පැටවීම සදහාය.එය ගග දිගේ දින තුනක පමණ ගමනක් වූ අතර ඒ ගමන අතර මග දෙපස වූයේ සදාහරිත ඇමසෝන් වැසි වනාන්තරයයි.අතරින් පතර කුඩා ගම්මාන හමුවූ අතර ගම්වැසි පිරිමින් කාන්තාවන් සහ කුඩා ලමුන්ද කුඩා බෝට්ටු වලින් නෞකාව ආසන්නයට පැමිණියේ නෞකාවෙන් යම් යම් දේවල් ලබා ගැනීමටය.අපද ආහාර,හිස් තීන්ත බැරල්,කෑන් ආදිය වතුරට විසි කල අතර ඔවුන් ඒවා රැගෙන අත වනා අචාර කොට ඉවතට යාත්‍රා කලෝය.
මුංගුබා යනු එක ජැටියකින් සමන්විත ඉතා කුඩා වරායකි. ජැටිය පැත්තේ නොව ගගේ අනිත් ඉවුරේ ගම්මානය පිහිටා තිබුණි. හවස් යාමයේ අප ගම නැරඹීමට පිටත් වූයේ බෝට්ටුවකිනි.ඒ ගම්මානය අපූරු ගම්මානයකි.ගගට වන්නට ලී කොටන් සිටවා ඒ මත ගම්මානය ගොඩ නගා තිබුනි.පාර තනා තිබුනේද ලි කොට සිටවා ඒ මත ලෑලි සවිකිරීමෙනි. ලොව පුරා ඇවිද ඇතත් එවන් අපූරු ගම්මානයක් කිසිදා මා දැක නැත.මැදියම් වන තුරුම අප ගමේ තිබූ අවන්හලකින් ආහාර සහ බීර පානය කරමින් ගම් වැසියන් සමග අල්ලාප සල්ලාපයේ යෙදීමට ඒ දින කිහිපයේ හුරු වූවෙමු. දින කිහිපයකට පසු අප වරායෙන් පිටත්වන මොහොතේ ගම්වැසියන් බොහෝදෙනෙකු ඉවුරට පැමිණ අත වනා අප හට සමු දෙන්නට තරම් ඔවුන් අප හා ලෙන්ගතු විය.

නමුත් ඇමසන් ගංගාව අත්ලාන්තික් සාගරය හා එක්වන ප්‍රදේශය ආසන්නයේ ඇති තවත් වරායකදී අප ලැබූයේ වෙනස්ම අත්දැකීමකි." විලා ඩි කොන්ති "නම් එම වරායට පිවිසීමට පෙර නෞකාව වරාය ආසන්න මුහුදේ නැංගුරම් දමා තිබුනේ නෞකාවට පැටවීමට තිබූ භාණ්ඩ සූදානම් වන තුරුය.රාත්‍රී කාලයේ. හොර රහසේම නෞකාවට ලංකල බෝට්ටුවක සිටි හොරු රංචුවක් නෞකාවට ගොඩවී නෞකාවේ තීන්ත කාමරය බිද ඒ තුල තිබූ තීන්ත බදුන් විශාල ප්‍රමාණයක් පැහැර ගත්තෝය.මැරයින් පේන්ට් යනු ඉහල වටිනාකමක් ඇති තීන්තය. ඉන් සමාගමට සිදුවූයේ සැලකියයුතු පාඩුවකි.පසු දිනක ගොඩබිමට ගිය විට ගම් වැසියන් සමහරක් අපගෙන් විමසා සිටියේ නුඹලාගේ නැවට සොරුන් ගොඩවී තීන්ත පැහැර ගත්තා නේද යන්නය..පසුව දැනගත් පරිදි එය එම වරාය ආශ්‍රිතව නිරතුරුව සිදුවන දෙයක් බවය.
එම වරායේදීම මා සමග එක් පිලීපීන ජාතික අවන්හල් හිමිකරුවෙක් මා සමග දැඩි ලෙස හිතවත් විය.නෞකාව පිටවීමට පෙර ඔහු මට අපූරු යෝජනාවක් ගෙනාවේය.එය නම් ඔහු ලබා දෙන පාර්සලයක් බෙල්ජියමේ ඇන්ට්වර්ප් වරාය වෙත ගෙනගොස් දෙන ලෙසය.ඇන්ට්වර්ප් වලදී කිසිවෙකු පැමිණ මා ගෙන් එම පාර්සලය ලබාගනු ඇති බවටත් ඒ වෙනුවෙන් විසල් මුදලක් මට ලබා දෙන බවටත්ය. එවර අපගේ ගමනාන්තය වූයේ බෙල්ජියමේ ඇන්ට්වර්ප් වරායයි. මා ඒ යෝජනාව සැනින් ප්‍රතික්ෂේප කලේ පාර්සලයේ ඇති දෑ ගැන මනා වැටහීමක් තිබූ නිසාය..

ඔබ බොහෝ නෞකා දැක ඇත.ඒ අතර කන්ටේනර් ,මගී ප්‍රවාහන, තෙල් නෞකා මෙන්ම භාණ්ඩ ප්‍රවාහන නෞකාද දැක ඇතැයි සිතමි.නමුත් මස් පිණිස ගන්නා සතුන් ප්‍රවාහනය කරන නෞකා ඔබට නුහුරු දසුනක් වනවා ඇතැයි සිතමි.මස් පිණිස හරක්,බැටළුවන් සහ එළුවන් නෞකා මගින් ( Livestock careares ) බොහෝ රටවලට ප්‍රවාහනය කෙරේ.විශේෂයෙන් මැද පෙරදිගට සතුන් ප්‍රවාහනය කරන්නේ මේ නෞකා මගිනි.මෙම සතුන් නැව්ගත කරන ප්‍රධාන රටක් වන්නේ බ්‍රසීලය යි.මේ සිදුවීම සිදුවූයේ "අරටු "නම් වරායේදීය. අප නවතා තිබූ ජැටියේම අනිත් පස ගැටගසා තිබුනේ කැට්ල් කැරියරයකි.ට්‍රක් රථවල පටවාගෙන පැමිනෙණ හරකුන් පාලමක් ආධාරයෙන් නැවට පටවමින් තිබිණ. මරණ බය දැනෙන නිසාදෝ ගවයන් පසුපසට ඇදෙන විට විදුලි සැර වැද්දවීමේ හැකියාව ඇති දිග රිටක් වැනි යමකින් ගවයන්ට විදුලි සැරයක් වද්දවා බියපත් කොට ඔවුන්ව නෞකාවට ගොඩවීමට සලස්වයි.යම් අතපසු වීමකින් දැවැන්ත ගවයන් දෙදෙනෙකු පාලමෙන් පැන ජැටියට පැනගත්තෝය.ඔවුන් දිවි බේරා ගැනීභට ජැටිය පුරා දිවූ අතර මිනිසුන් උන් දෙන්නා අල්ලාගැනීමට වෙර දැරූහ.දෙපසකින් නෞකා දෙකත් අනිත් පසින් මුහුදත් තිබූ අතර ඔවුන්ට පැන යාමට තිබුනේ ජැටියේ එක් පැත්තක් පමණි.ඒ පැත්ත ට්‍රක් රථ දෙකක් යොදා හරස් කල අතර ගවයින් දෙදෙනා කොටුවිය. නමුත් උන් සටන අත ඇරියේ නැත.දැවැන්තයින් දෙදෙනෙකු වු ඔවුන් අනින්නට පනිමින්ද වේගයෙන් දිවයමින්ද තම ජීවිතය සදහා අවසානය තෙක් සටන් වැදුනෝය.අවසන බැකෝ යන්ත්‍රයක් මගින් උන් එකා බැගින් හිරකොට වෙර යොදා නෞකාවට පැටෙව්වේය. පසුව ආරන්චි වූයේ එම ගවයන් දෙදෙනා එසැනින් මරා දමා මස් නෞකාවේ කාර්යමණ්ඩලයට භාවිතයට ගත් බවකි.සිරියානු සහ ලෙබනන් ජාතික එම නාවිකයන් කිහිප දෙනෙකුම මට මුණගැසුණු අතර ඔවුන් ලගින් හැමූ ලේ මිශ්‍ර අමුතු ගන්ධය මට ගෙන ආවේ අපුලකි.තම ජීවිතය සදහා සටන් වැදුනු ගවයන් දෙදෙනා අදද මසිතට ගෙන එන්නේ ශෝකයකි.

බ්‍රසීලයේ දී මා හට ලැබුනු තවත් අපූරු අවස්ථා කිහිපයක් නම්. රියෝ දි ජැනෙයිරෝ නගරයේ පිහිටා ඇති ලොව පරසිදු ක්‍රිස්තුස් වහන්සේගේ පිලිමය දැක බලා ගැනීමට හැකිවීම සහ අලංකාරම වෙරලක් වූ කෝපා කබානා වෙරල දැක ගැනීමය.එමෙන්ම රියෝ හිදීම අතිශය විරල අවස්ථාවක් අපහට උදා වූ අතර ඒ ලොව පරසිදු බ්‍රසීල ""කර්නිවාල් ""
සැනකෙලිය දෑසින් දැකගැනීමට ලැබුනු අපූරු අවස්ථාවයි.

අප තවමත් ජෝර්දානයේ අඛබා වරායේ රැදී සිටින අතර ඊලග ගමනාන්තය වන්නේ ඉන්දියාවේ කණ්ඩලා වරායයි.ගාන්ධිවරුන් උපන් භූමිය ලෙස සැලකෙන එම ප්‍රාන්තයේ ලාංකික නාවිකයන්හට ගොඩබිමට බැසීමට අවසර නැත.ඒ රාජිව් ගාන්ධි අගමැතිවරයාට තුවක්කු බදෙන් පහරදීමේ සිදුවීමට ඔවුන් ලාංකිකයන් වෙත දැක්වු ප්‍රතිචාරයයි. එමෙන්ම අඛබා වරාය ගැනද යමක් නොලියා බැරිය.ඒ ඊජිප්තු, ඊශ්‍රායෙලයේ, සවුදිය සහ ජෝර්දාන් යන රටවල් හතරේම දේශසීමා එක තැන සිට බලාගත හැකිවීමය.ලොව වෙනත් තැනකදී මෙවන් දසුනක් දැකගැනීමට හැකියැයි මා සිතන්නේ නැත.

මතු දිනයක හමුවෙමු.ඔබට ජය
ධම්මික පෙරේරා @ අඛබා.ජෝර්දාන්.

1 livestock carrier
2 vessel in munguba port
3 underway in river
4 carnival
5 christ the redeemer rio de janeiro

Friday, October 29, 2021

කවි

ජංගි පොඩ්ඩත් ඉනෙන් ගැලවී පුක පේන්නට හැලුන කාලේ
තාත්තා උඩුබැලිව හිටියා පෙට්ටියක ගේ මැද්දෙ සාලේ
හතයි මට බොට තුනයි නංගියෙ තාම රිද්දන අපේ බාලේ
තනුව වැරදිලු අපේ ජීවිත ගැහුවෙ කරුමෙට ඕන තාලේ

ගෙටවෙද්දි දෙන්නට අනේ අම්මට තිබුනෙ නෑ බං රනින් මාලේ

කහ ගැහෙනකොට තාත්තගෙ රූපෙට පලන්දපු සුදු පාට මල් පෙති
අම්මා හිනැහෙන එකම රූපෙට දාපු මල් පෙති සුදට දිලිසෙති
දත් නොදත් උන් තාම ඉඳහිට යනෙන විට ගෙට ගොඩවෙලා යති
නොයෙක් කරදර ගොඩක් අතරේ උඹ දුරක ගොස් මම දැක්කෙ නැති

කලා සොලොසම සපුරලා සඳ හා පැටියෙකුත් එක්ක එන්නැති


කිව්වනං අයියට ඉතින් පොඩ්ඩියෙ යන්තමට හරි උගේ නම ගම
උන් තැනක හිඳ අරන් ඇවිදින් බලෙන් හරි බන්දනවා උඹ මම
මාස හතරක් වෙලා යනකං හොරෙන් මට ඒ හැංගු වත්කම
කියා ගන්නට බැරි උනේ ඇයි අදයි උඹෙ හත් දොහේ පිංකම

වැරදිලා ගොස් හඳත් මැකිලා හාවා එලවන තැනක සැත්කම

Friday, October 5, 2018

අප්‍රිකා මතක

## නැව් කථා 08 ## අප්‍රිකානු මතක

අප්‍රිකාව. .ඒ අපූරු භූමිය.නාවිකයෙකු ලෙස ලොව හතර අතේ ඇවිද ඇති මට ලොව අන් රටවල් වලට වඩා අපූර්වත්වයක් ඇති මහාද්වීපයයි.ඒ අපූර්වත්වය ඇත්තේ භූමියේ ඇති විවිධත්වය සහ මිනිසුන්ගේ හැගීම් වල විය යුතුය.ලොව අන් කිසිම තැනකදී නොවිදි අතීදැකීම් මා අප්‍රිකාව තුලදී අත්විද ඇත.සහෝදර නාවිකයන් විදි අත්දැකීම් අසා ඇත.ලිවිය හැකි අත්දැකීම් පමණ මෙන් කිහිප ගුණයක් නොලිවිය හැකි අත්දැකීම්ය.😀
       ලොව මා දැක ඇති සුන්දරම තැන කුමක්දැයි යමෙකු ඇසුවහොත් මාගේ පිළිතුර වනු ඇත්තේ දකුණු අප්‍රිකාවේ කේප් ටවුන් නගරය යන්නයි.නගරය පරයා නැගී සිටින මහ කඳුවැටිය ( TABLE MOUNTAIN )දෙනෙතට සිතට දනවන්නේ අපූර්වතම හැගීමකි.දේශගුණය ඉතා සිසිල්ය.මීදුම් වෙලාවට කදු වැටියේ සිට ගලා හැලෙන මිහිදුම මතකයට ගෙනෙන්නේ නයගරා ඇල්ලයි.එවකට මා සේවය කල නෞකාවක ගමන් මග වූයේ දකුණු අප්‍රිකාව සහ අප්‍රිකාවේ බටහිර තීරයේ රටවල් කිහිපයක් අතරයි.දකුණු අප්‍රිකාවේ රිචර්ඩ්ස් බේ,ඩර්බන් සහ කේප් ටවුන් වරායන් ආශ්‍රිතව බඩු පටවාගන්නා අපේ ඊලග නැවතුම්පලවල් වන්නේ නැමීබියාවේ වොල්විස් බේ වරායත් ඇන්ගෝලාවේ නැමීබ් සහ පොයින්ට් නෝර් වරායනුත්, කොන්ගෝවේ බෝමා සහ මටාඩි වරායවලුත් ඉන්පසු ගැබොන් රටේ ලිබ්රවිල් සහ තවත් වරායකුත් ඉක්වේටර් ගිනියා රටේ බාටා වරායත් අවසාන වරාය ලෙස කැමරූන් රටේ ඩුවාලා වරායත්ය. කැමරූන් වලින් ලී කදන් පටවාගන්නා අප නැවත කේප්ටවුන් වෙතලගා වන විට සම්පූර්ණ ගමනටම දින හතලිස්පහක් ගතවේ.දුරකථන පහසුකම් ඉතා අල්පව තිබූ එකල අප කේප්ටවුන් වෙත එන විට දැඩි සතුටකින් පසුවන්නේ ලංකාවෙන් එන සියලු ලියුම් කේප් ටවුන් සීමන් මිෂන් එකට එවා තිබීම නිසාය.

   දිනක් සේවා නිමවී හවස් වරුවක අප මිතුරන් කිහිප දෙනෙකු ඩර්බන් නගරය වෙත යෑමේ අදිටනින් පා ගමනින් මාර්ගය දිගේ ඇවිද ආවෙමු.වේගයෙන් අප පසුකරගෙන ගිය කැබ් රථයක් එය නවතා රිවස් කර අප අසලට පැමිණ නැවැත්විය.කොහේද යන්නේ සහ අපගේ රට විමසූ ඔහු ඉන්දීය සම්භවයක් ඇති අප්‍රිකානු වෙකි.අපගේ ඉන්දීය පෙනුම නිසා රථය නැවැත්වූ බව පැවසූ ඔහු අපට උපදෙස් දුන්නේ ඩර්බන් යනු පිටරැටියන්ට පා ගමනින් යෑමට තරම් ආරක්ෂාකාරී නගරයක් නොවන බවත් ටැක්සියක් කැඳවා අපගේ ගමන් පහසුව සලසා ගන්නා ලෙසත්ය.දුම් වැටියක් සදහා පවා මිනී මැරීමට වුවද මෙහි සමහරුන් පසුබට නොවන බව පැවසූ ඔහු නික්ම ගියේ පරිස්සම් වෙන ලෙස අවවාද කරමිනි.ඉන් පසු නිතර කුලී රියකින් ගමන් පහසුව සලසා ගැනීමට අප හුරු වූයෙමු
    අප සමග සේවය කල ඔයිලර් කෙනෙක් දිනක් තනිවම දකුණු අප්‍රිකාවේ පෝට් එළිසබෙත් වරායෙන් එලියට ගියේය.නෞකාව පිටත් වන මොහොත ලගා වුවත් ඔහු නැවත පැමිණියේ නැත.නෞකා නියෝජිතයාටද දන්වා ඔහු පිලිබදව සොයා බැලූවත් ඔහු පිලිබද ආරන්චියක් නොවීය.නෞකාව පිටත් වන වෙලාව පැමිණියෙන් අප පිටත් විය.අපගේ මීලග වරාය වූවේ දකුණු අප්‍රිකාවේ ම රිචර්ඩ්ස් බේ වරායයි.එයට ලගා වීමට අප හට දින තුනක් පමණ ගතවූයේ මේ ආශ්‍රිත මුහුද නිතරම රලු වීම නිසාය.වරායට පැමිණි පසු අප හට ඔහු පිලිබද නිසි තොරතුරක් ලැබුණි.ඔහු සිටියේ රෝහල් ගතවය. තනිව එලියට ගිය ඔහු හොරුන් කිහිප දෙනෙකුට මැදිවී ඇත.ඔහුට දරුණූ ලෙස පහරදී ඔහු සතු සියලුම දෑ හොරුන් මංකොල්ල කා තිබිණ,ඔහු ඇද සිටි කමිසය සහ කලිසම පවා ඔවුන් රැගෙන ගොස් ඇත.පැය කිහිපක් මහමග වැටී සිටි ඔහු පොලිස් රථයකින් දැක රෝහල් ගත කර ඇත.පසුව නියෝජිතයකු මාර්ගයෙන් ඔහු ලංකාවට එවීය.පසුව ඔහු රෝහලේ සිටියදී ගත් සේයා රූ කිහිපයක් නෞකාවට ලැබිණ. කොතරම් දරුණු ලෙස ඔහු පහර කා ඇත්දැයි කිවහොත් අප කිසිවෙකුටත් ඔහුව හදුනාගත නොහැකි විය.
     මොසැම්බික් රටේ මපුතෝ වරායෙන් අප එලියට ගියේ යම් යම් දේ මිලදී ගැනීම සදහාය.මිතුරන් කිහිප දෙනෙකු සහ මා සාප්පු සංකීරණයක ඇවිද යම් යම් දේවල් මිලදී ගත්තෙමු.මිලදී ගත් දේ කුලී රථයේ තබා අප අවන්හලකට ගොඩවැදුනේ දේශීය බියරයක් රස බැලීමේ අරමුනෙණි.කුලී රථය ලෙස අප කථා කරගත්තේ වරාය සේවකයකු සතු රථයක් නිසා ඔහුටද අප ආරාධනා කලේ අප සමග එන ලෙසටය.පැයක් පමණ අවන්හලේ ගතකල අප නැවත රථයට ආවේ නෞකාව බලා පිටත්වීමේ අරමුණෙනි. රථයට පැමිණ බලන විට අප මිලදී ගත් භාණ්ඩ කිසිවක් රථයේ නොවීය.කිසිවෙකු රථයේ අගුළු ඇර සියල්ල සොරාගෙනය. මෙයට රියදුරාද සම්බන්ධ ඇතැයි සිතූ අප ඔහුට දොස්පැවරූවත් කදුලු සලමින් ඔහු අපට පැවසුවේ ඔහු කිසිත් නොදන්නා බවත්,ඔහු පිලිබද සැකයක් ඇත්නම් කුලී ගාස්තුවද ඔහුට අනවශ්‍ය බවත්ය.කුලිය ගෙවූ අප එකිනෙකාට සිනහවෙමින් නෞකාවට ගොඩවූයේ නැතිවූ බඩු බොහෝ වටිනා දේ නොවූ නිසාවෙනි.
    නැව් කථාවක් ලියන්නට සිතා නොසිටියත් කණ්ඩාගේ ඉල්ලීම නිසා ලියන්නට සිත්විය.ලිවීමට තව බොහෝ දේ ඇතත් නවතින්නේ කම්මැලිකම බොහෝ වේලාවක සිට කණෙන් අදිමින් සයනයේ ඇති සුව පහසුව මතක් කරන නිසාය..කියවූ සැමට ස්තූතී.
Dammika perera @ Dammam port.